[網絡潮文] 創業兩年都失敗，不如分手吧！
編按：當被女友數落，各位男士都可能想說一句：「不要再說了」。（網絡圖片）
齊集內地及本地 fintech 創業者：錢方、都都寶、WeLab、Bitcoinnect 及更多嘉賓，討論最新 fintech 趨勢及發展機會，《互聯網金融科技峰會》只此一場費用全免 — 立即報名。名額先到先得。
「今晚，去返我們開始的公園傾下心事，好嗎？」Joyce 帶點沙的聲線問拍拖五年的男友 Daniel
Daniel： 「BB，今晚要見客呀，可能會好夜喎。你無咩事嗎？」
Joyce： 「唔緊要，我先食飯，跟住就係公園等你啦…」
Daniel： 「噢，咁好啦， 我盡快開完會趕過泥。」
簡簡單單的對白，想不到竟然會是一場積壓了良久的大戰開端。
Daniel 和 Joyce 是大學同學，由於Daniel積極樂觀的性格，對人生又充滿抱負與理想，很早已深深吸引著Joyce的目光。Year 1 臨近終結的時候，就是他們戀情的開端，積極男配可人兒， 當時真是羡煞旁人。
「我已到公園了，不用急，比心機開完會才過來吧」Joyce 給了Daniel 一個短訊
Daniel亦以短訊回覆道 : 「B∼ 係唔係好掛住我呢？ 已趕緊來啦，仲買了你最喜歡的芝麻湯圓」
大學畢業後，Joyce順利去了一間大行做見習經理 （Management Trainee )。 而拿著1st Hon的Daniel則受到當時香港熾熱的創業氣氛影響，公屋出生的他沒什麼錢，畢業後一邊廂找了兩份較彈性工作時間的兼職，以幫補家計，另一邊廂則與朋友合伙開了一間Consultant公司，Daniel的每一天也相當辛勤，咬實牙關渡過每一天的創業歲月。
「今晚做咩無端端去返我地開始的地方呀？」Daniel來到公園，如常溫柔地攬實Joyce
Joyce: 「仲記唔記得，你當日點樣係呢度向我表白？」
Daniel： 「哈，傻瓜，好似係你鐘意我先但又唔夠膽做主動，要我開口呢。 當然記得，五年前我係呢度大聲唱 “喜歡你 那雙眼動人 笑聲更迷人” ，果陣都不知幾尷尬，好多人望住我地」
Joyce： 「你先至係傻瓜呀，咁老土係度唱 Beyond 的歌」
Daniel: 「我是創業的， Beyond 的歌每一首都係我們的精神良藥，同我走過好多好多的日子」
Joyce突然沉靜了起來，細細聲說：「對，你都創業了兩年時間。 有時我會諗，若果你當初無選擇創業，今天的我們會是怎樣呢？」
Daniel: 「B，做咩突然咁問？」
Joyce: 「我身邊一個又一個的朋友都在準備結婚了。而你好似同我傾都無傾過呢個話題。 莫講話結婚，呢兩年你愈來愈少陪伴我，每一日都話好忙要比心機做野，就算難得可以去旅行，你又要帶埋電腦去，我都唔知係你心目中我的地位究竟排係邊到。」
Daniel: 「唉∼ 好對唔住，我都知呢兩年，我一直都好專注、好比心機想自己間公司可以發大，攪到自己真係無咩私人時間」
Joyce: 「其實，你都創業兩年啦。 我平時睇報紙都見到什麼80後創業月賺7位數字，點解… 點解… 我唔識講，點解仲未到你呢？」
Daniel有些面有難色，好像有很多話想說，但又不知如何說好：「um … …. um… 」
Joyce： 「我唔係話你創業唔成功，我相信捱到兩年都唔係容易的事。 但如其每日都咁辛苦，有無諗過不如搵返份穩穩定定的工作好過呢？」
Daniel： 「BB，我都帶過你去青年創業軍這個組織的活動，還記得那句莫欺少年窮的口號嗎？ 創業的人，一定要堅持。 今天雖然不算什麼成功，但只要我一直堅持落去，我相信自己總有出頭天」
Joyce： 「你就是一直都是這麼傻瓜，大學的時候我們還年青，可以談理想。 但而家我們已經踏出社會，衣食住行咩都要錢，認真點面對現實好嗎？」
Daniel: 「我當然一直都有面對現實，為左同時供養家人同埋攪好間公司，我每日除左處理公司的工作，還要做兩份兼職搵外快。 呢兩年，我幾乎無放過假，每一日都只係可以訓5個鐘」
Joyce: 「That’s the point, 既然咁辛苦都得唔到你想要的結果，點解仲唔變通？」
Daniel有些氣餒：「BB, 其實此時此刻，我最需要的是你的支持，而不是埋怨… 」
Joyce ： 「我唔係咩港女，其實我只不過係想要一個平平淡淡的生活，放工可以同你行街、睇戲、食飯，有時放假可以一齊去下旅行，就係咁簡單。 但係自從你創業開始，就完全陪不到我了，有些時候我真係懷疑自己究竟有無男朋友！ 」
Daniel: 「好吧，我答應你，將來盡量陪你多一點。 但係，我希望你都明白，我間公司才剛起步兩年，這段時期是很重要的搏殺期，的確需要花更多時間和心血係裡面… 」
「等！等！等！ 你要我等幾耐呀？ 我係女仔，個樣會慢慢變老，你係唔係想我變到人老珠黃先影婚紗相？ 唉… 仲有將來生仔，係唔係要我做高齡產婦？」 Joyce 愈說愈激動，這些年來的心底話好像通通要和盤托出。
Daniel 眼中已有些淚水: 「… … 對不起，創業的每一天都好像過山車般，我真的答應不到你什麼 … 但，我愛你」
Joyce: 「若果你真的愛我，可以答應我立即搵返份穩定的工作，然後再同我一齊計劃結婚嗎？」
Daniel: 「BB∼ 求你不要迫我好嗎？ 我真的好想好想在創業路上創出自己的新天地。 你當初不就是鐘意我有抱負有理想嗎？ 」
Joyce: 「Ok, fine! 我地再討論下去都無意思！ 不如，就當我港女一次，你創業兩年都失敗，不如我們分手吧！」
Daniel十分驚訝，完全比不了反應 「什… 什麼？」 他嘗試張手再次緊緊攬著Joyce，但Joyce已急急腳離去了，五年的感情由這個公園開始，想不到亦從這兒結束
那天分手過後，Daniel嘗試用不同的方式找過Joyce，但Joyce都一一沒有回應。 人總要向前行，Daniel 只好化悲憤為力量，繼續努力走他的創業之路。
分手後大約一年，Joyce 已另覓對象，與在銀行做MT時的 Supervisor拍拖。某晚二人在公司加班趕Project時， Joyce 上網聽電台節目輕鬆一下。
「哇，好犀利呀，今晚我地請到近來剛剛奪得青年創業軍的傑出青年創業家大獎得主Daniel，同我地分享他的成功創業故事！」節目主持這樣說。
Daniel: 「主持客氣了，不敢稱得上什麼成功，反而這些年累積了很多傷疤」
節目主持： 「Daniel你實在太謙啦，我睇過你的相關報道，唔單只攞傑出創業獎，你而家每個月賺成七位數，而且仲寫緊書教90後新一代的創業家創業…」
Joyce一直聽著，她當然知道，今天這位傑出的創業家就是她的前男友Daniel。 整個節目，她都很認真在聽著，一聲也沒有發出過，好像很怕會錯過了些什麼。
節目主持： 「好啦∼好多謝Daniel的精彩分享， 去到節目的最後，Daniel不如幫我們揀首歌，送比其他的創業者好嗎？」
Daniel: 「好呀！ 我知好多創業者都好鐘意聽Beyond的歌，好熱血好有鼓勵性。 但今晚，我想送給大家的，反而是Beyond的一首情歌 <<喜歡你>>，其實創業與愛情並不是絕緣體，我希望每一位創業者都會好好珍惜你的另一半，而作為創業者的伴侶，切記、切記莫欺少年窮。」
「喜歡你 那雙眼動人 笑聲更迷人
願再可 輕撫你 那可愛面容
挽手說夢話 像昨天 你共我」
動人的歌聲依然動人，但過去的一切都真的已經過去。
作者感言：
雖然是創作故事，但這並非無中生有，都是從其它青年創業者累積下來的心聲。
今天的青年創業很火熱，滿街都是什麼成功創業故事，但創業者真正的心聲、真正面對的處境就好像啞子吃黃蓮般，有苦自己知。
希望小弟這些「創作故事」，能從青年創業者第一身的角度出發，讓社會大眾了解我們更多。
支持EJ Tech
如欲投稿、報料，發布新聞稿或採訪通知，按這裏聯絡我們。
