Don't Miss
事實係
By Kenneth Kwok on December 15, 2015
本文作者為Beehive Strategy創辦人Kenneth Kwok，原文刊於作者博客
「打雜」
創業係唔係預期咁咁容易？咁簡單？咁開心？其實就梗係唔係啦！作為一個創業者，其實處理嘅事務真係唔係淨係話你有生意頭腦就得，因為好多嘢其實都要逐樣逐樣咁摸索。有兩樣嘢一定係每個創業者嘅煩惱，第一樣係法律問題，因為你唔會係律師！第二係會計嘅問題，因為你亦唔係專業會計師！但係嚟兩樣其實先至系最緊要。除此之外你其實都應該係一個打雜，仲話自己係老細喎！哈哈！
「事實」
當好多人以為創業會比起打工舒服，其實又係一個謬論。點會有可能會輕鬆過打工呢？以前你可以高薪厚職準時出糧，以前你可以叫下屬同團隊幫你做嘢，以前朝頭早返工夜晚休息，但係當你係老闆嘅時侯就完全相反。好多時係日頭開會，夜晚先嚟做嘢。以前話一日做十幾個鐘，深夜開會好鬼辛苦，但係起碼你可以揀收工，乜都唔理。但係自己嘅公司，你覺得可以咩？
「選擇」
我經常同啲學生講，如果搵工我會睇下有無學嘢嘅機會，你做嘅嘢有無人欣賞，公司越少政治越好。如果符合以上條件，錢少啲唔係問題，最緊要係自己開心。而自己創業，最緊要嘅係你覺得開唔開心，當然生活都好緊要，所以首先係要搞掂基本生活，如果唔係一定唔開心，事關你會面臨四面楚歌。另外同打工一樣，有無學到嘢，有無成長，就算創業失敗，至少學咗嘢。最後就係成功感，因為創業會比打工有成功感，就算受到挫敗其實都係成功嘅一部份，只要覺得自己做嘅嘢總會有一日係會成功嘅話，咁就足夠了。
支持EJ Tech
如欲投稿、報料，發布新聞稿或採訪通知，按這裏聯絡我們。
