大獲！男朋友話要創業

本文作者温學文為青年創業軍及腦爸打有限公司創辦人

Ronald 是一名月薪6萬元的大行經理，還有1年才30歲，從小就成績優異，會考高考都順風順水，大學獲甲級榮譽畢業。畢業後，很順利就和比自己年輕1年的同事Jenny拍拖，幾年來的感情都相當穩定，亦剛開始一同儲錢結婚。

閒時無事做，除了Part Time讀Master，男兒志在四方，Ronald 也會同班死黨討論創業大計。原本只是三分鐘熱度，每次開會後都沒有行動。 但近來，可能整個香港大環境也在鼓吹創業風，加上去了幾次熱血的「青年創業軍」聚會，下下都高喊「莫欺少年窮」，使Ronald 也真的心動了。

今年的情人節，Ronald打扮得斯斯文文，在黃金海岸訂了枱吃自助餐，準備同Jenny 渡過又一年的情人節。但今年有些不同，因為Ronald 決定比一個驚喜Jenny！

R: 「Cheers! 情人節快樂！」

Jenny放低白酒杯話: 「Yaaah！ 若果每一年的情人節都咁開心就好啦！」

（兩人甜蜜地望了對方一眼，這對年輕情侶的確很有夫妻相。 等等，Ronald 突然認真了起來…）

R: 「BB，你覺得一位成功的男人應該係點樣？」

Jenny望住個餐牌: 「呀？ ∼ 係我心目中，成功的男人就係你咁樣！」

Ronald拿走Jenny個餐牌: 「唔係玩呀，認真答我」

Jenny有少少炆，但又認真回答: 「坦白講，男人一定要有責任感，是一家之主，所以有啲錢的確會比較有安全感。 哎呀，其實將來有兒有女，真係要有樓、有車都好合理，如果唔係出入又唔方便，又無自己住的地方。 我唔係咩港女，呢啲都係合理嘅必需品。」

Ronald 冷靜地分析： 「但係香港而家嘅樓價你有眼睇，根本就係天文數字，我本身又係一名屋邨仔，憑著自己嘅努力總算拎到少少學歷，又搵到份唔失禮嘅工作。 但係，即使係咁，同樓價嘅天文數字相比，就算幾高嘅人工都好似追唔到！」

J: 「Hey! 事在人為啫，慢慢供慢慢捱啦！」

R: 「未來嘅大半生，好似比間屋綁著咁，又要死頂份工唔可以比人炒，否則連樓都供唔到，咩尊嚴咩自由都無晒。 哲學家尼采話自由就是不再對自己感到羞恥呀！」

Ronald 開始激動起來：「我地細細個，老師話要學咩就學咩，考試要考咩就死記硬背那些課本內容，去到中五選科，老豆話文科搵唔到食所以要選理科或者商科，以為去到大學可以相對自由，點知朋友同埋網上論壇班巴打又話讀商科先係唯一的出路。 出到來社會，咩都要睇上司面色，病左都唔敢請假，每年就係度倒數Annual Leave。 而家仲要話供大半世樓？ 咁樣的人生，真係有活過咩？」

Jenny一邊切神戶牛一邊話: 「Hey，我唔知邊位係尼采，但係你諗下先，有樓先叫做自由呀。 如果唔係，出去租樓住，唔知幾時又要被迫加租，又或者業主無端端話要賣樓迫我地搬，咁樣搬來搬去仲邊有自由呀？」

Jenny放低刀叉，望住Ronald: 「Ok fine. 我比你講，近來的你好奇怪，我其實一早已見到你係公司好唔專心，做野無晒動力。今晚明明係情人節，你又突然間係度問咩叫成功的男人，其實你想做咩呢？」

R: 「創業，我想創業！」

J: 「吓！？ 創業？ 你發神經呀？ 」

Jenny 已忍不住火 ： 「 你點創業！？ 講來聽下你有咩創業大計。」

R: 「我打算辭左而家份工作，然後專心同David 合組一間公司，開發一隻香港史無前例的手機遊戲，我地好有信心一定會爆紅！ 外國好多手機遊戲都賺好多錢，亦隨時比人用一大筆錢收購。 而且，搵錢之餘，亦同時幫助埋香港的創意工業。」

J: 「哈，你知唔知攪一個手機遊戲要幾多錢？ 你同David 都唔識寫程式，搵人開發必定六位數字，而且分分鐘攪半年都未出得街。 之前Sharon 個男朋友就係咁，比左十幾萬出去攪隻Call的士Apps, 點知攪成半年先出到街，到而家都推出左一年，每個月都仲蝕緊錢！結果點呀？ Sharon 已經想分手，佢男朋友又灰晒，咩動力都無，白費左好多錢同時間！」

Ronald 開始有些焦急: 「你咁講，即係話若果我真係創業，你有機會同我分手？」

J: 「 Hey 成熟一點啦好無，你都差不多30歲人。Sharon 個男朋友就話只得中五學歷，你假假地都係碩士，點解思想仲好似小朋友咁！？ 你屋企已經唔係有錢，讀咁多書就係為左搵份好工，希望將來的日子好過啲。 你而家事業先叫剛剛起步，又同我儲緊錢準備結婚，你唔好因為一時的衝動，傷害你身邊的人啦。 你話要自由，但唔該你睇清楚，今晚的自助餐都好似好自由，你想食咩就拎咩野，但大前提係要你有錢埋單先可以有呢個自由呀！ 我唔想… 我唔想… 將來的日子好似過山車咁，我只想同你平平淡淡咁渡過 … 」

(Jenny 說著說著，已忍不住流下淚水，Ronald 也深知不應該再吵下去了）

（翌日的早上，Ronald 的電話響起）

J: 「BB, 仲未醒呀！？ 快起身返工啦！」

( Ronald 帶著已沒有衝勁的身軀，每天繼續假裝很努力地工作，最多間中偷偷地上Facebook 葡萄一下又有什麼80後創業賺大錢完成理想的新聞。 但一切，Ronald也明白到，這些機會不是屬於他的了）

 

支持EJ Tech

如欲投稿、報料，發布新聞稿或採訪通知，按這裏聯絡我們。